தமிழக_சட்டமன்றத்தேர்தல்_2021

தேர்தல் காலம் அடிப்படையில் மக்கள் பிரச்சினைகளைக் கவனப்படுத்துகிற காலம். வெற்றிபெறும் பொருட்டாவது அரசியல் தலைமைகள் மக்களின் பிரச்சினைகளைப் பற்றிப் பேசுவார்கள் என்று எதிர்பார்த்தோம். அந்த எதிர்பார்ப்பு பொய்த்துக்கொண்டிருக்கிறது. ஊடகங்களும் மக்களின் பிரச்சினைகளைத் தலைவர்களுக்கு நினைவூட்டுவதற்குக் கிஞ்சித்தும் அக்கறை கொள்ளவில்லை. இதுவும் ஒரு முக்கியமான சிக்கல்.

கொரோனா பெருந்தொற்றுச் சிக்கல் அரசுகள் உருவாக்கியதல்ல. ஆனால் ஒன்றிய, மாநில அரசுகள் அதைக் கையாண்ட முறைதான் மக்களுக்குப் பெரும் பீதியை, துயரத்தை, பேரிழப்பை ஏற்படுத்தியது. அடித்தட்டு மக்களுக்கு நிவாரணங்களை அறிவித்திருக்க வேண்டிய அந்தக் காலத்தில் அதைச் செய்யாமல் மக்களைத் துன்புறுத்தியது. ஒன்றிய அரசின் பண மதிப்பிழப்பு நடவடிக்கையினால் தீவிரவாதத்தையும் கருப்புப் பணத்தையும் ஒழித்துவிடலாம் என்கிற அதன் பசப்பலுக்கு ஒத்து ஊதியது. தூய்மையான காற்றுக்கும் நன்னீருக்கும் அகிம்சை வழியில் போராடிய தூத்துக்குடி மக்களின்மீது துப்பாக்கிச் சூடு நடத்தி 15 உயிர்களைத் துள்ளத்துடிக்கக் கொன்றது.

ஒன்றிய அரசின் சுற்றுச்சூழல் தாக்க அறிக்கை (திருத்த) மசோதா, தேசிய வேளாண் கொள்கை, தேசிய மீன்வளக் கொள்கை, குடியுரிமைத் திருத்த மசோதா, கடற்கரை ஒழுங்காற்று அறிவிக்கை போன்ற கருங்காலிச் சட்டங்களை தமிழக மக்களின் உணர்வுகளோடு இணைந்து நின்று எதிர்ப்பதற்குப் பதிலாக ஒன்றிய அரசுக்குத் துணை நின்றது. ஒக்கி, கஜாப்புயல் பேரிடர்க் காலங்களில் உரிய எச்சரிக்கை, நிவாரண, மறுகட்டுமான நடவடிக்கைகளில் தோற்றுப்போனது. ஒக்கிப் புயல் சூழலில் தமிழக மீனவர்களை மீட்பதில் அலட்சியம் காட்டியது. காட்டுப்பள்ளி அதானி துறைமுக விரிவாக்கத்துக்கும் பெங்களூரு சென்னை அதிவிரைவுச் ச்சாலைக்கும் அனுமதி அளித்து, அதன் மூலம் திருவள்ளூர்க் கடற்கரை மற்றும் உள்ளூர்ப் பகுதி மக்களின் பாரம்பரிய வாழிட வாழ்வாதாரங்களை அழிக்கத் துணைபோனது; பழவேற்காடு ஏரி, மாமுனி ஏரி, எண்ணூர் ஓடை, பக்கிங்ஹாம் கால்வாய் உள்ளிட்ட நீராதாரங்களை அழிவின் விளிம்பில் நிறுத்தியது; அதன் மூலம் சென்னைப் பெருநகரைப் பெருவெள்ளப் பேரிடருக்கு இலக்காக்கியிருக்கிறது. சேலம் நான்கு வழிச்சாலைத் திட்டத்தை விவசாயிகளின் மீது திணித்தது. நிலம் தர மறுத்துப் போராடிய விவசாயிகளைத் துன்புறுத்தியது. ஒருபுறம் மேக் இன் இந்தியா என்று கூவிக்கொண்டு மக்களின் வாழிட/வாழ்வாதார மூலங்களான பொதுச்சொத்து வளங்களைக் கார்ப்பொரேட்டுகளுக்குப் பொட்டலம் போட்டுக் கொடுத்துக் கொண்டிருக்கிறது ஒன்றிய அரசு. இரயில்வே, தொலைத்தொடர்பு, காப்பீட்டுத் துறை உள்ளிட்ட அரசுத் துறைகள் தனியாருக்குத் தாரைவார்க்கப் படுகின்றன. நாம் அனுபவித்துவரும் துயரங்களின் பட்டியல் மிக நீளமானது என்பதால் இத்தோடு நிறுத்திக் கொள்கிறேன். இத்தனைச் சேதங்களையும் மக்கள் மீது நிகழ்த்தி முடித்த அரசுகள் மட்டுமல்ல குற்றவாளிகள்; அதற்கு மௌன சாட்சியாகவும் பரப்புரையாளர்களாகவும் ஆதரவளித்த தலைமைகளும்தான். இவர்களை இனம் கண்டு ஒதுக்கும் தெளிவு மக்களுக்கு வேண்டும். ‘உங்கள் வாக்கு புனிதமானது, அதனை வீணாக்காதீர்’ என்று வேதம் ஓதும் இந்தச் சாத்தான்களிடம் நாம் கவனமாய் இருக்க வேண்டும். நம் முன்னோர்கள் நீண்ட காலமாய்ப் போராடிப் பெற்ற கல்வி உரிமையைக் காவு வாங்குவதற்கு நீட் போன்ற திட்டங்களைக் கொணர்ந்தும் தமிழ்நாட்டவர்களின் அரசுதுறை வேலை வாய்ப்புகளைத் தந்திரமாய்ப் பறித்தும் அரசியல் சூது நிகழ்த்தும் பிற்போக்குச் சக்திகளையும் அவற்றுக்கு ஆற்றுப்படை பாடும் கட்சிகளையும் புறக்கணிக்க வேண்டும். அரசியல் இலாபத்துக்காக, தேர்தல் அறிவிப்பதற்கு ஓரிரு நாட்களுக்கு முன்னால் பிற்படுத்தப்பட்டோர் ஒதுக்கீட்டில் சட்டவிரோதமாக ஒரு குறிப்பிட்ட சாதியினருக்கு 10.5% உள்ஒதுக்கீடு கொடுத்து மற்ற சாதியினருக்குப் பெரும் அநீதி இழைத்தது மாநில அரசின்அறமற்ற செயலாகும். மக்களின் நம்பிக்கையைப் பெறுவதற்குக் கட்சிகள் வாக்குறுதிகளை வழங்கினால் மட்டும் போதாது. மேற்குறிப்பிட்டவை உள்ளிட்ட ஒவ்வொரு பிரச்சினையிலும் தங்கள் கொள்கை நிலைப்பாடுகளைத் தெளிவாகப் பேசவேண்டும்.

அடிப்படைவாதம்/பேரினவாதம் / பெரும்பான்மை வாதத்தை முன்வைக்கும் பிற்போக்கு, பாசிசச் சக்திகளுக்குத் தமிழ்நாட்டில் இடமில்லை என்கிற நிலை தொடரவேண்டும்; தங்களது கொள்கைகளை வெளிப்படையாகப் பேசுமாறு கட்சிகளைக் கேட்கவேண்டும். இதற்கு முன்பு ஆண்டவர்கள் ஒன்றும் அக்மார்க் யோக்கியர்களல்லர். சேதுக்கால்வாய், கூடங்குளம் எதிர்ப்புப் போராட்டங்களின்போது கிடைத்த கசப்பான அனுபவங்களை மறந்துவிட முடியாதுதான். எதார்த்தம் என்ன? நம்மை ஆள்வதற்கு ஆகாயத்திலிருந்து மீட்பர்கள் இறங்கிவரப் போவதில்லை. இன்றைக்குக் களத்திலிருப்பவர்களில் குறைந்த அளவு ஆபத்தானவர்களைத் தேர்ந்தெடுக்கலாம். மக்களாட்சியை விட்டால் நமக்கு வேறு வழி? ஒன்றை மட்டும் நினைவில் வைத்திருப்போம்: அரசியல் என்பது தேர்தலோடு முடிந்துவிடுவதல்ல. விடுதலைக்கு நாம் கொடுக்கவேண்டிய விலை தீவிரக் கண்காணிப்புதான்.

30 மார்ச் 2021