முப்பது வெள்ளிக் காசுகளும் சில வகைத் தோட்டாக்களும்.

முப்பது வெள்ளிக் காசுகளும்

சில வகைத் தோட்டாக்களும்.

வரலாற்றை மாற்றும்

வார்த்தைத் தோட்டாவை உதிர்த்த

வாய்க்குள் நுழைந்த 

எஃகுத்தோட்டா சொன்னது:

“உனக்கும் எனக்கும் விடுதலை!”

மூளையின் சிந்தனைப்

பிரதேசத்துக்குள் புகுந்த மற்றொரு  

தோட்டா  சொன்னது: 

“அறிவுக்குப் பயந்த பிறவிகளிடமிருந்து 

எனக்கும் விடுதலை!”

வதைமரணத்துக்குக் கட்டியம் சொல்லும்

இரப்பர் தோட்டாக்களும்

கண்ணீர்ப்புகைக் குண்டுகளும்

'மூன்றாம் கல்'லில்

எதிரும் புதிருமாய்ச் சந்தித்துக்கொண்டன:

“அரசவதையின் வரலாற்று கறைபடியாமல்

நாம் இருவரும்  தப்பித்துக்கொண்டோம்.”

அலைவாய்க்கரையில்
தன்வேலையில் மூழ்கியிருந்த

நிராயுதபாணியான பெண்ணை

தேடிச் சென்று  உயிர்பறித்த

மற்றொரு தோட்டா

'144'  முறை அடித்துச்சொன்னது-

“நாய் விற்ற காசு குரைக்கவே குரைக்காது.”

மீன் கேட்ட பிள்ளைக்குப்

பாம்பைக் கொடுத்த

குடி அறம்  பேணும் பெருந்தந்தை

உயிர்வளி கேட்டோர்க்கு

'மே'லும் 22 தோட்டாக்கள் பரிசளித்தான்.

என் மகள் வாய்க்குள் பாய்ந்த தோட்டாவும்

என் சோதரியின் தனிமைக்குள் எட்டிப்பார்த்த

பாலியல் வக்கிரத் தோட்டாவும் 

ஒரே  வகைதொகை .

கவச வாகனத்தின் கூரையோ

ஈருருளியின் பின்னிருக்கையோ

கணினியின் விசைப்பலகையோ-

தளம் எதுவெனினும்

அதிகார பீடத்தின் ஆசிகளுடன் பாயும் 

தோட்டாக்களின் இலக்கு ஒன்றுதான்.

அதிகாரத்தின் தந்தைமை

எப்போதும் போல

மரணநிழல் படிந்தே கிடக்கிறது.

கங்கைகொண்டான் காவிரி வென்றான்

மட்டுமா தமிழன்?

சீதக்காதிபோல் செத்தும் கொடுத்தவன்

மட்டுமா தமிழன்?

சேர்ந்தவர் உயிரை எடுத்தான் தமிழன்!

வாழ வழியின்றிப் போராடிய

தன் சமூகத்தை,

நிலத்தை, நீரை, காற்றை,

தன் சந்ததியின் எதிர்காலத்தைக்

கூட்டிக் கொடுத்தான் தமிழன்!

முப்பது வெள்ளிக் காசுகளுக்காக

தன் மண்ணைக் கூறுபோட்டுக் கொடுக்க

உள்ளூர் உளவாளிகளும் களவாளிகளும்

காவலாளிகளுடன் கூட்டுச்சேர்ந்த

அவல வரலாற்றுக்கு

நானும் ஓர் ஊமைசாட்சி.

• • •

பெருமணல்துறையோ,

இடிகரையோ

தாமிரமோ-

நாய்விற்ற காசு ஊரெங்கும் குரைக்கிறது.

மாசற்ற தலைமையின் குருதி

தெருவெங்கும் வழிந்தோடுகிறது.

உடன்பிறந்தவள் மானம் காக்கத்

தன்னுயிர் ஈந்த தமிழ் மரபில்

தோள்கொடுத்து நின்ற தோழமையை

உடன்பிறவாச் சகோதரியைக்

கொடும்பாவி கட்டித்

தீயிட்டுக் களித்தார்.

பெண்ணெனும் பெருந்தெய்வத்தைக்  

கேலிப்பொருளாக்கினார்.

நாய் விற்ற காசுடன் வந்த

புதிய இராமர்கள் இட்ட தீயில்

சீதைகள் நடைபழக விதித்த கதைகளைக் 

கண்ணகியின் ஒற்றைமுலை எரித்தழிக்க...

• • •

காணாமலான கணவர்கள்

வல்லுறவுக்குள்ளான பெண்கள்

இராணுவத்தின் காவலரே

காமத்தின் உருக்கொண்ட அவலம்

வடகிழக்கின் பழங்குடிப்பெண்டிர்

எண்மர்  அன்று பூண்ட நிர்வாணம்

சந்ததியர் மண்காக்க 

மானத்தை ஈகம் செய்த

கவன ஈர்ப்புத் தீர்மானம்.

நாகாலாந்தின்

அன்னையர் ஆயினர் அவ்வெண்மரும்.

தெற்கிலிருந்தும்  முளைத்தாள்

ஒரு சமூகப்போராளி.

மண்ணைக்காக்க மக்களைக் காக்க

மானத்தை விலையாய்த் தந்தாள்.

மயிர் நீப்பின் உயிர் வாழாக் கவரிமா.    

உயிர் ஈகம் எளிது;

மானம் ஈகம் பெண்ணுக்கரிது.

மூச்சுக்காற்றை நஞ்சாக்கும்

நாசகார ஆலைகளின்

கந்தக வாய்வினும் அபாயமிகுந்த

நச்சுப் பரப்புரைகள்

எங்கள் சுவாசப்பைகளை நிரப்புகின்றன.

அரிதினும் அரிது செய்தாள்

எங்கள் தலைமகள்.

கொல்லக்கூடும் நீங்கள் அக்கடல்மகளை;

வெல்லுதல் கூடுமோ?

நீங்கள் அவளை சிறையிலிடலாம்

மனிதமாண்பைச் சிதைக்கலாம்;

ஆனால்

வரலாறு அவளை விடுவிக்கும்.

[வரலாறு என்னை விடுவிக்கும் என்று முழங்கிய

பிடல் காஸ்ட்ரோவின் முதலாண்டு நினைவு நாளில்

ஓர் இணையற்ற சமூகப்போராளிக்கு

நான் சமர்ப்பிக்கும் வரிகள்.]

வறீதையா கான்ஸ்தந்தின்