கிறித்துவைச் சோதித்த சாத்தான் | வறீதையா கான்ஸ்தந்தின் The Satan that tempted Christ

The Satan that tempted Christ  
கிறித்துவைச் சோதித்த  சாத்தான்


முதலில் அவர்கள்

உன்னை உலகின் சிறந்த அறிவாளி

எனச் சிலாகிப்பார்கள்

உயர்ந்த சபைகளில் உனக்குச்

சிவப்புக்கம்பளம் விரிப்பார்கள்

வாழ்த்துமடல்கள் வாசிப்பார்கள்

பூங்கொத்துகள் தருவார்கள்

பொன்னாடை போர்த்துவார்கள்

நாட்டின் உயர்ந்த

விருதுகளை வழங்கி மகிழ்விப்பார்கள்

பிறகு விதிகள் எழுதுவார்கள்

உனது மேலாடை தொடங்கி

ஒவ்வொன்றாய் அவிழ்த்தெறிவார்கள்-

விதிகளின்படி

இறுதியாக

அதிகாரத்தின் உன்னத இருக்கையில்

உன்னை உட்கார வைப்பதற்கென

உனது உள்ளாடையை அவிழ்ப்பார்கள்.

நீ நீயற்றவனாய்க் கைகட்டி நிற்கவேண்டும்.

உன் குரலை அவர்களுடையதாய்க்

குத்தகைக்கு கொடுத்துவிடவேண்டும்.

அதிகாரத்தின் புதிய அரிதாரங்களை

அணிந்துகொள்ளவேண்டும்.

எப்போது எதை எப்படிப் பேசுவதெனக்

காலம் தோறும் கட்டளைகள் தருவார்கள்.

நீ நீயற்றவனாய்க் கைகட்டி நிற்கவேண்டும்.