திணைவெளி /நூல் மதிப்புரை/ கோமதிசங்கர் கோசார்

நுழைவாயில்

தொல்தமிழரின் சூழல் சார்ந்த வாழ்க்கை: தொல்காப்பியம் நமது தொல்தமிழரின் சூழல் சார்ந்த வாழ்க்கையை பதிவு செய்துள்ளது.

‘கைக்கிளை முதலாப் பெருந்திணை இறுவாய்

முற்படக் கிளந்த எழுதிணை என்பவற்றுள்

நடுவண் ஐந்திணை நடுவணது ஒழியப்

படுதிரை வையம் பாத்திய பண்பே.

முதல்கரு உரிப்பொருள் என்ற மூன்றே

நுவலும் காலை முறைசிறந் தனவே

பாடலுள் பயின்றவை நாடுங்காலை.

முதலெனப் படுவது நிலம்பொழுது இரண்டின்

இயல்பென மொழிப இயல்பு உணர்ந்தோரே…

…தெய்வம் உணாவே மாமரம் புள்பறை

செய்தி யாழின் பகுதியொடு தொகைஇ

அவ்வகை பிறவும் கருவென மொழிப…

தமிழரின் அகவாழ்க்கை ஏழு திணைகளைக் கொண்டது. அவற்றில் நிலம் சார்ந்தவை நடுவில் உள்ள ஐந்து திணைகள். பாலை ஒழிந்த பிற நான்கு திணைகளான மலை சார்ந்த வனம் சார்ந்த வயல் சார்ந்த கடல் சார்ந்த நான்கு நில மக்களின் வாழ்க்கை நிலமும் பொழுதும் சார்ந்தன.. வழிபடும் தெய்வம் உணவுப் பழக்கம் விலங்குகள் மரங்கள் பறவைகள் இசைக் கருவிகள் செய்தொழில் என எல்லாமும் நிலம் சார்ந்தன. திணை என்ற சொல் நிலம் குறித்தும் நிலம் சார்ந்த அனைத்தையும் உள்ளிட்ட எல்லாவற்றையும் குறிக்கும் சங்க காலச் சொல்.. நிகழ்வாழ்வில் இந்தச் சொல்லை நாம் தொலைத்து விட்டோமோ..?

சொல்லை மட்டுமா தொலைத்தோம்?

170 பக்கங்களில் மூன்று பகுதிகளாக ஆசிரியரின் 24 கட்டுரைகள் தொகுக்கப் பட்டுள்ளன. அத்தனையும் ஆய்வு சார்ந்தவை. பல்வேறு தருணங்களில் இதழ்களில் எழுதப்பட்டதும் அரங்கங்களில் வாசிக்கப் பட்டவையுமாகும். சூழலியல் மற்றும் இயற்கை குறித்த யதார்த்தவாத படைப்புகளின் நூல் மதிப்புரைகளையும் உள்ளிட்டவை. சூழலியல் குறித்த எத்தனை படைப்புகள் தமிழுலகில் விரிந்து கிடக்கின்றன.. இந்த நூல் பல யதார்தத்தவாதப் புனைவுகளிடமும் அபுனைவுகளிடமும் நம்மை கைப் பிடித்து அழைத்தும் செல்கிறது..

நம்மில் பலருக்கு தெரிந்த செய்திகளும் தெரியாத செய்திகளுமாக கடல்சார் வாழ்க்கைச் சூழலும் சூழல் குலைந்த அச்சமும் மிக நல்ல தமிழில் அழகாக பதிவு செய்யப் பட்டுள்ளன. கட்டுரைகள் சுவாரசியமானவை..ஆசிரியரின் நுண்மான் நுழைபுலம் துலங்கித் தோன்றும் அற்புதச் சொல்லாடல்களால் எளிதில் மனம் நுழையும் வண்ணம் ஆக்கப்பட்ட கட்டுரைகள்.

நூல் சூழலியல் செயல்பாட்டாளரும் மனித உரிமை ஆர்வலரும் ஆகிய பேரா.பாத்திமா பாபு அவர்களுக்கு சமர்ப்பணம் செய்யப்பட்டிருப்பது மிகப் பொருத்தமாய் தோன்றுகிறது..

கட்டுரைகளிலிருந்து…

1. முகம் மாறும் நிலம்..

நிலவியலை பூமி தோன்றிய காலம் தொட்டு தற்போது வரையிலான சுருக்கமான பார்வையில் தொடங்கி நெய்தல் திணைவெளி முகம் மாறி நிற்பதை அறிவியல் பார்வையில் பதிவு செய்துள்ள கட்டுரை..

கட்டுரையின் ஒரு பகுதி :  “ இயற்கை வளங்கள் இரண்டு வகை : ஒன்று ‘மீளப்பெற இயலா வளங்கள்’ மற்றொன்று ‘வற்றா வளங்கள்’. பயிர் வளமும் ஏனைய உயிர் வளமும் மீண்டும் மீண்டும் உருவாகின்றன என்பது உண்மைதான் எனினும் சாதகமான சூழல்களில்தாம் அது சாத்தியப்படும். சான்றாக பெருங்கடல் முழுவதும் மீன்கள் நிறைந்து கிடக்கின்றன. அவ்வளங்கள் ஒருபோதும் அற்றுப் போகாது என்கிற நம்பிக்கை ஒரு காலத்தில் நிலவியது. ‘வளங்களின் வற்றாயிருப்பு’ என்கிற இந்தக் கோட்பாடானது தகர்ந்து விட்டது; ‘வற்றும் தன்மையதே வளம்’ என்னும் புதியபார்வை ஏற்கப்பட்டு விட்டது.”

2. கோடரியும் ஹோமோசபியன்சும்.

மனிதன் நெருப்பையும் சக்கரத்தையும் கண்டறிந்த தருணங்களில் மனிதகுல நாகரிகம் பிறந்திருக்கும் என்றால் 25000 ஆண்டுகளுக்கு முன்பு கோடரியை கண்டறிந்ததிலிருந்து மனித குலத்தின் அழிவுக்கு தொடக்கப் புள்ளி உருவானதை பரிணாமக் கொள்கை வாசனையோடு சொல்லும் கட்டுரை..

காடழித்தல் என்பது பருவ மழை தவறுதல் மற்றும் பொய்த்துப் போதல் பூமியின் வெப்ப அதிகரிப்பால் துருவப் பனிப் பாறைகள் சரிதல் கடல் நீர்மட்ட உயர்வு என்று வரிசையாக கட்டுரை நம்மை சொற்களால் மயக்கிச் செல்கிறது..

(குழுமத்தில் நண்பர் முகமது ஷா அவர்களின் ‘கார்பரேட் கோடரி’ என்ற நூலுக்கான பதிவை நினைவு கூர்க.)

3. அந்தமான் ஜாரவா.

அந்தமான் தீவுகளின் ஜாரவா பழங்குடிகளின் இயற்கையோடு இயைந்த வாழ்வைச் சொல்லி 2004 ஆம் ஆண்டு சுனாமியை அவர்கள் வென்றதைச் சொல்லும் கட்டுரை. கூடவே பழங்குடிகளை அவர்கள் வாழிடங்களிலிருந்து அந்நியப் படுத்தும் நிறுவனக் கொடுமைகளையும் சொல்கிறது.

4. பூஜ் குறிப்புகள்.

குஜராத் பூஜ் பகுதியில் 2001 இல் நடந்த நிலநடுக்கப் பேரிடரைத் தொடர்ந்த மறுகட்டுமானத்தில் சேவை நிறுவனங்களின் பணியைச் சொல்லி 2004 இல் தமிழகக் கடலோர சுனாமிப் பேரிடரில் அவர்களின் பணி தோல்வி அடைந்ததை ஆராயும் கட்டுரை.

'பல்லாயிரம் கோடிப் பணம் மறுவாழ்வுக்காகக் கொட்டப் பட்ட பிறகும் தமிழ்நாட்டு மீனவர்களுக்கு ஏன் மறுவாழ்வு சாத்தியமாகவில்லை' என்ற கேள்விக்கு பதில் சொல்லும் விதமான கட்டுரை.

5. நெத்திலிப்பாடு.

நெத்திலி மீன்களைக் காட்டிலும் நெத்திலிக் கருவாட்டுக்கே சுவையும் அதனால் வருவாயும் அதிகம்..ஆனால் நெத்திலி படுவதோ மழைக்காலத்தில்..கட்டுமரம் கொள்ளாத நெத்திலி மீன்கள்.. கருவாடாக்க வெயிலுக்கு எங்கே போவது..?

ஏர் பழகிய பயிர்த் தொழில் செய்பவன் இயந்திரங்களுக்கு பழகிக் கொண்டது போல் மீன்களைக் கருவாடாக்க நவீனத் தொழில் நுட்பங்களை மீனவர்கள் பழகிக் கொள்ளத் தயங்குவதும் அவற்றை அறிமுகப்படுத்த முன்வராத அச்சமூகத்தின் படித்தவர்களையும் கேள்வியெழுப்பும் கட்டுரை இது.

6. கரைமடி.

காந்திய அறநெறியாளர் ஜே.சி.குமரப்பா அவர்களின் ‘காந்தியப் பொருளாதாரத்தை’ அறிமுகம் செய்து துவங்குகிறது இந்தக் கட்டுரை..திணைக் குடிகளின் மண்சார்ந்த வாழ்வு திரு.குமரப்பா முன்வைக்கும் ‘அகிம்சைப் பொருளாதாரம’ என்பதான சமூகத்தின் எல்லா மனிதருக்கும் சம வாய்ப்பை தருவதும் எவரையும் புண்படுத்தாததும் ஆகும் என்பதைச் சொல்ல மீனவச் சமூகத்தின் ‘கரைமடி’ என்னும் கரைவலைத் தொழிலை சான்று காட்டும் கட்டுரை..கரைமடி கன்னியாகுமரி கடற்கரையில் அடுக்கி வைத்த கற்சுவர்களால் காணாமல் போய்க் கொண்டிருப்பதை பதிவு செய்கிறது..

7. தாய் மொழியில் அறிவியல்.

மகத்தான இந்த நூலின் முத்திரைக் கட்டுரை என்றால் இதுதான்..இந்தக் கட்டுரை வாசிப்பு என்னை புளகிக்கச் செய்தது என்றால் அது மிகைக் கூற்றல்ல.. தொன்று தொட்டு வரும் திணை சார்ந்த வாழ்க்கையை இதற்கு முன்னால் இத்தனை செறிவுடன் நான் படித்ததில்லை. நூலாசிரியரின் நிறைந்த தமிழ் பழக்கமே இவ்வளவு அழகான கட்டுரையை உருவாக்கியிருக்கும் என்பதில் ஐயமில்லை. இந்தக் கட்டுரையின் உள்ளடக்கமே என்னை இந்தப் பதிவின் நுழைவாயிலை எழுதத் தூண்டியது…

புதிய சூழல் கொள்கை, புதிய கல்விக் கொள்கை என்பதெல்லாம் எத்தகைய மோடி மஸ்தான் வேலைகள் என்பதை முன்னுரைக்கும் கட்டுரையும் கூட.

8. சீர்நிலை என்னும் சூட்சுமம்.

இயற்கை தனது இருப்பை இயல்பிலேயே சீராக வைத்திருக்கும் போக்கை உயிரியல் விதிகளாலும் சுவாரசியமான நிகழியல் உதாரணங்களுடனும்; சொல்லும் கட்டுரை..

9. கடலுயிர் - இயற்கை வரலாறு

உயிரினங்களின் (மனிதர்கள் உள்பட) கடந்த காலம் அவற்றின் மரபியல் நினைவுகளாக மரபணுக்களில் பதியப் பெற்ற விபரங்களை முதலில் சொல்லி அவற்றை மீற மனிதன் வரலாறு முழுவதும் எத்தனிப்பதை தொல்லியல் காலம் தொடங்கி தற்போது வரையிலும் எடுத்துக் காட்டும் கட்டுரை. பல்வேறு உள்தலைப்புகளில் விவாதிக்கிறது.

கட்டுரையிலிருந்து..

“வாழும் உயிரினம் ஓவ்வொன்றும் சூழலியல் கட்டமைவின் கண்ணி. அதன் அழிவு இயற்கையின் இயல்பான இயக்கத்தை ஊடறுப்பதாய் அமையும். கடலில் மிதவைத் தாவரங்கள் அழிந்து போனால் மீன் வளம் அற்றுவிடும். நிலத்தில் பாம்புகள் இல்லாமல் போனால் தவளை எலி இனங்களின் தொகை பெருகி சூழலமைவு சமன் குலைந்து விடும். இயற்கையின் உணவு வலைப் பின்னலில் ஒவ்வோர் இனத்திற்கும் பதிலியற்ற தனித்துவமான இடம் உள்ளது.”

ஓநாய்க் குலச்சின்னம் நாவலில் ஓநாய்களின் மீதான அழித்தொழிப்பு வேட்டை மங்கோலிய மேய்ச்சல் நிலத்தின் சூழலமைவு சமனைக் குலைப்பது ஞாபகம் வருகிறதல்லவா..

10. மூதாய் மரமும் சங்கிலி வாளும்..

திரு. நக்கீரன் அவர்கள் எழுதியுள்ள ‘காடோடி’ நாவலின் அழகான நூல் மதிப்புரை.

‘காடோடி’ நாவலில் வரும் மூதாய் மரத்தின் கதையை முன்வைத்து வனங்கள் தொடர்ந்து அழிக்கப் படுவதையும் அதனால் வனம் சார்ந்த மக்களின் வீழ்ச்சியோடு சங்கிலி போல இணைந்து கொள்ளும் மருத நெய்தல் திணைகளின் வீழ்ச்சியையும் விவரிக்கும் கட்டுரை. “கடல் பெரிது. மனித மனத்தின் பேராசையோ கடல்களையே விழுங்கிவிடும் அளவு பெரிதானது.” என்கிறார் நூலாசிரியர் திரு. வறீதையா கான்ஸ்தந்தின்.

(குழுமத்தில் ‘காடோடி’ நாவல் பற்றிய நண்பர் கதிரின் பதிவை நினைவு கொள்க.)

11. மொழியில் உயிர்பெறும் கடல்;..

‘கடலறிவுகளும் நேரனுபவங்களும்’ என்ற திரு. இராபர்ட் பனிப்பிள்ளை அவர்களின் மலையாள யதார்த்தவாத நூலுக்கான சிறப்பான மதிப்புரை. கடல் மைந்தன் இராபர்ட் பனிப்பிள்ளையின் சாகச அனுபவங்கள் வாயிலாக கடலோடிகளின் கடல் குறித்த மரபார்ந்த அறிவையும் தற்போது கடல் வளத்தைக் கொள்ளையிட வலை வீசும் கார்ப்பரேட்டுகளால் கடலோடிக் இனக் குழுக்கள் கடல் புரத்தை விட்டு விலக்கப் படுவதையும் அதனால் கடல் புரம் காவலற்றுக் கிடப்பதையும் சொல்லும் கட்டுரை.

12. சூழலியல் உரைகல்..

சூழலியல் ஆர்வலர் திரு.தியோடர் பாஸ்கரன் அவர்களின் ‘கையிலிருக்கும் பூமி’ என்ற வனங்காத்தல் சூழல் விழிப்புணர்வு நூலுக்கான மதிப்புரை.. சூழலியல் கரிசனம் நேர்மையானதாகவும் சரியான புரிதலுடன் கூடியதாகவும் பிரதேச இயற்கை வரலாற்று பண்பாட்டு வள அரசியல் பார்வை கொண்டதாகவும் அமைதல் வேண்டும் என்பதை தமக்கு உணர்த்தியதாக பாஸ்கரன் அவர்களின் நூலை மெச்சிப் பேசுகிறார் திரு. வறீதையா கான்ஸ்தந்தின். நூல் மதிப்புரை என்ற வகைமைக்கு ஒரு நல்ல சான்று… (குழுமத்தில் தோழன் பிரசன்னா திரு.தியோடர் பாஸ்கரன் நூலொன்றுக்கு பதிவொன்று தந்திருந்தான். அதே பதிவின் பின்னூட்டத்தில் ‘கையிலிருக்கும் பூமியை’ குறிப்பிட்டிருக்கிறான். பதிவை எதிர் பார்ப்போம்)

13. நெத்திலிக் கருவாட்டின் வாசனை..

பாரதி புத்தகாலயம் வெளியிட்ட திரு. செல்வராஜ் அவர்களின் ‘செள்ளு’ என்ற கதைத் தொகுப்புக்கு திரு. வறீதையா கான்ஸ்தந்தின் தந்திருக்கும் நூல் மதிப்புரை இக்கட்டுரை..

திரு.செல்வராஜ் மீனவ செயல் ஆர்வலராக இயங்கி வருபவர். முக்கியமான சமூகச் சிக்கல்களை இப்படைப்பாளி அவற்றை தனது படைப்பனுபவத் தளத்தில் பறிமாறும் போது அவை சமூகத்தின் கவனத்தைப் பெறுகின்றன என்கிறார் திரு. வறீதையா கான்ஸ்தந்தின்.

14. வள அரசியல் - தலித்தியப் பார்வை..

திரு. மா.அமரேசன் அவர்களின் ‘நடுங்கும் நிலம் நடுங்கா மனம்’ என்ற நூலுக்கு அறிமுக உரை. மக்கள் பிரச்சினைகளை ஆய்வு செய்து அறிவியல் ஏடுகளில் வெளியிடுவதால் மக்களுக்கு ஒரு நன்மையும் கிடைக்கப் போவதில்லை.. சமூகப் போராளி திரு. மா.அமரேசன் போன்ற பலரும் தாங்கள் கண்டடைந்த உண்மைகளையும் வாழ்க்கை அனுபவங்கள் ஏற்படுத்திய புரிதல்களையும் எழுத்தில் வடித்து மக்களிடம் சேர்த்துக் கொண்டிருப்பதை மெச்சுகிறார் திரு. வறீதையா கான்ஸ்தந்தின்.

மலை, வன, நில, கடல் வளங்கள் பொறுப்பற்று சுரண்டப்படுவதால் சூழல் நிகழ்வுகளின் வழித்தடங்கள் ஊடறுக்கப் படுகின்றன என்பதை தலித்தியப் பார்வையுடன் உரத்துச் சொல்லும் கட்டுரை.

15. இமிழ் பனிக்கடல்: வரலாற்றை மீள எழுப்புதல்.

தமிழறிஞர் திரு.R.பாலகிருஷ்ணன் I.A.S. அவர்கள் ‘சங்கச் சுரங்கம்’ இணைய வழி உரைத் தொடரில் ‘இமிழ் பனிக்கடல்’ என்ற தலைப்பில் சென்ற மாதத்தில் செய்த உரையிலிருந்து ‘சங்க இலக்கியத்தில் கடல்’ குறித்த பார்வையைத் தருகிறது இந்தக் கட்டுரை.

(தோழன் பிரசன்னா இந்த இணையவழி உரைத் தொடரை அவனது காலக்கோட்டில் சொல்லி வந்தான்.)

கட்டுரையிலிருந்து..

‘கடலில்லாத தமிழையும் தமிழில்லாத கடலையும் நினைத்துப் பாருங்கள்’

‘தொல்காப்பியம் முன்வைக்கும் திணைக் கோட்பாடு இயற்கை குறித்த நம் முன்னோர்களின் புரிதலின் மீது கட்டியெழுப்பப் பட்டுள்ளது.’

‘வனம் போலன்றி கடலோடிகளது வேட்டைக் களம் சலித்துக் கொண்டிருக்கும் விரிநீர்ப் பரப்பு என்பது கூடுதல் அபாயமானது’

16. கடலோர வனங்கள் எங்கே?

நெய்தல் நன்னீர் ஆதாரங்களைத் தொலைத்து நிற்கும் தமிழகக் கரைகளின் கதையைச் சொல்லும் கட்டுரை..

அலையாத்திக் காடுகள் கிட்டத்தட்ட அழிந்து போனதையும் பக்கிங்காம் கால்வாய் (நெல்லூருக்கு வடக்கிலிருந்து வந்து பழவேற்காடு ஏரியை இணைத்துக் கொண்டு புதுச்சேரிக்கு வடக்கே ஒட்டேரி கடற்கரையில் கடலைச் சேரும்) மற்றும் அனந்த விக்டோரியா மார்த்தாண்ட வர்மா கால்வாய் (தென் கேரளம் பரவ10ர் தொடங்கி மண்டைக்காடு வரை வெட்டப்பட்டது) ஆகிய நீரிணைகள் தூர்ந்து வருவதையும் மெல்லிய சினம் தோன்றச் சொல்லும் கட்டுரை.

கடலோரத்தில் படர்ந்து விரிந்திருந்த வனங்கள் கடலோர மணல் வெளி அகழ்வாலும் கழிமுக நீரோட்டம் நின்று போனதாலும் மறைந்து போனதை சொல்லி மாய்கிறது இந்தக் கட்டுரை.

17. அரையடி மண்.

மணற் கொள்ளையர்களாலும் கனிம வளக் கொள்ளைக்காரர்கள் தோண்டும் சுரங்கங்களாலும்; மண்வளம் மறைந்து போவதை தொலைந்து போன நாகரிக வரலாற்றுப் பின்னணியில் அலசுகிறது கட்டுரை.

கட்டுரையிலிருந்து

“பூமிப்பந்தின் அற்புதமான கூறு அதன் மேல் மண்தான். பூமிப்பரப்பின் மேல் மெல்லிய படலமாய்க் கிடக்கும் இந்த அரையடி மேல்மண்தான் மனித நாகரிகத்தின் அடித்தளம் உயிர்களின் ஆதாரம். மனித குலத்தின் மாபெரும் கண்டு பிடிப்புகளுக்கெல்லாம் ஆதாரம் இந்த அரையடி மேல் மண்ணும் அதன் மீது விழும் மழைத்துளிகளும்தான்.”

18. மூன்று பெண்கள் முடிவற்ற தேடல்.

மாபெரும் அணைக்கட்டுத் திட்டங்கள் பூர்விகத் திணைக் குடிகளை இடப்பெயர்வுக்கு உள்ளாக்கி அவர்களின் வாழ்வாதாரத்தை அழித்துவிடுகின்றன. கஸ்தூரி அதிகாரி(மேற்கு வங்கம்) சதாக்ஷி கவாடே மற்றும் வினயா குறித்கோட்டி(மராட்டியம்) ஆகிய மூன்று பெண்கள் பொதுப் போக்குவரத்து வசதியில்லாத தங்குமிடம் கழிப்பிடம் போள்ற அடிப்படை வசதிகள் ஏதுமற்ற மத்தியப் பிரதேச மலைக்கிராமங்களில் நெடும்பயணம் மேற்கொண்டு புலம் பெயர்ந்த பெண்களிடம் பெண்ணுரிமைக் கோணத்தில் நடத்திய கள ஆய்வைச் சொல்லும் கட்டுரை..

19. கடற்கரைக்கு ஒரு இரங்கற்பா.

சுற்றுலாக் கலாச்சாரத்தில் தொலைந்து போகும் சூழலியலைப் பேசும் கட்டுரை.

20. காவு கேட்கும் கடல் பாசி.

கடற் பாசிகளின் பயன்பாட்டைச் சொல்லி இயல்பாகத் தொடங்கும் கட்டுரை அதே இயல்புடன் கடல் வெளியில் ‘கப்பாஃ பைகஸ் பாசி வளர்ப்பு’ என்னும் பெப்சிகோ பன்னாட்டு நிறுவனத்தின் கொடூரமான வணிக நுழைவைச் சொல்கிறது..

கடலின் சத்தை எல்லாம் உறிஞ்சிக் கொண்டு கடல் தாவரங்களையும் மீனினங்களையும் அழித்துவிடும் அபாயத்திற்கு பார்த்தீனீயப் பரவலையும் திலேப்பியாக் கெண்டை மீன் பரவலையும் சொல்கிறது கட்டுரை. இக்கட்டுரை விரிய விரிய நெஞசம் பதறுகிறது..

‘உயிரியல் ஊடுருவல்’ என்றொரு பதத்தை அறிமுகப் படுத்துகிறார் நூலாசிரியர். அதை அவர் விரிக்கும் போது கொரானாத் தொற்று போல பல தொற்றுகளை இந்த உலகம் காணப் போகும் அச்சம் மனதில் படர்கிறது..

21. காயப்பட்ட கடற்கரை.

கடற்கரை மணல்கொள்ளை பற்றிய இன்னுமொரு கட்டுரை..

22. கடற்கரை வெளியேற்று மண்டலம்,

23. கடலோடிகளற்ற கடற்கரை.

கடற்கரை அந்நிய மயமாதலின் விளைவாக நெய்தல் திணைக்குடிகளின் பரிதாபமான இடம் பெயர்வை விரிவாகச் சொல்லும் கட்டுரைகள்.

24. இடிந்தகரை: குலைநடுக்கும் பேரிடர்.

நூலின் பெரிய கட்டுரை.. கூடங்குளம அணு உலையின் ஆபத்தை எதிர்த்து நடந்த மக்கள் இயக்கத்தை உலகம் தழுவிய அணு உலை ஆபத்தின் பின்னணியோடு சொல்லும் கட்டுரை..

24 கட்டுரைகளும் சூழலியலும் இயற்கையியலும் குறித்த மாபெரும் விவாதங்களை முன்னெடுப்பவை..புதிய சுற்றுச் சூழல் கொள்கை எத்தனை ஆபத்தானது என்பதை கட்டியம் கூறுபவை..நண்பர்களை வாசிக்கப் பரிந்துரைக்கிறேன்.