வறீதையா கான்ஸ்தந்தின் (பிறப்பு:
நவம்பர் 6, 1959) தமிழ் எழுத்தாளர். பேராசிரியர், ஆய்வாளர், களச் செயற்பாட்டாளர். நெய்தல்
நில மக்களின் வாழ்வியல், சிக்கல்களை கட்டுரைகள், கதைகள் மூலமாக பதிவு செய்கிறார். ஆங்கிலத்திலும்
சில நூல்களை எழுதியுள்ளார்.
பிறப்பு, கல்வி
வறீதையா கான்ஸ்தந்தின் கன்னியாகுமரி மாவட்டம் பள்ளம்துறையில்
கான்ஸ்தந்தின் லாரன்ஸ், எலிசபெத் கான்ஸ்தந்தின் இணையருக்கு ஏழாவது மகவாக நவம்பர்
6, 1959இல் பிறந்தார். வறீதையா கான்ஸ்தந்தின் பிறந்த ஊரில் புனித ஜூட்ஸ் நடுநிலைப்
பள்ளியிலும், சியோன்புரம் எல்எம்எஸ் உயர்நிலைப் பள்ளியிலும் பள்ளிக் கல்வியை நிறைவு
செய்தார். பள்ளியிறுதித் தேர்வில் பள்ளியிலும் ஊரிலும் முதலிடம் பெற்றதைத் தொடர்ந்து,
கோட்டார் கத்தோலிக்க திருஅவையின் உயர்கல்வித் திட்டத்தில் தேர்ந்தெடுக்கப்பட்டு உயர்கல்வியும்
தலைமைப் பயிற்சியும் பெற்றார்.
நாகர்கோவில் ஸ்காட் கிறித்தவக் கல்லூரியில் உயிரியலில் புகுமுக
வகுப்பும் (1976) விலங்கியலில் இளங்கலைப் பட்டமும் (1980), பாளையங்கோட்டை சேவியர் கல்லூரியில்
முதுகலைப் பட்டமும் (1982) ஆய்வியல் நிறைஞர் பட்டமும் (1988) பெற்றார். தேங்காய்ப்பட்டினம்
கழிமுகத்தின் உயிர்ச் சூழலியலை ஆய்வு செய்து, மதுரைக் காமராசர் பல்கலைக் கழகத்தில்
முனைவர் பட்டம் (1997) பெற்றார். 1989இல் அண்ணாமலைப் பல்கலைக் கழகத்தில் ஆற்றுப்படுத்துதல்
- வழிகாட்டுதலில் முதுநிலைப் பட்டயம் பெற்றார்.
தனி வாழ்க்கை
வறீதையா செப்டம்பர் 7, 1987இல் ஜெசிந்தாவை மணந்தார்.
இணையர் இரவிபுத்தன்துறை புனித ஜோசப் நடுநிலைப் பள்ளியில் தலைமை ஆசிரியராகப் பணியாற்றி
ஓய்வு பெற்றார். மகள்கள் ஆட்லின் பெத் நான்சி, ஒஷீன் லாரா; பெயரர்கள்- டாரில், ரெய்னல்.
பணிநிறைவுக்குப் பின் மூன்றாண்டுகள் சென்னையில் வாழ்ந்தார். தனிப்பட்ட தேவையை முன்னிட்டு
இப்போது தன் வசிப்பிடமான மேற்கு கலிங்கராஜபுரத்தில் வாழ்கிறார்.
ஆசிரியப்பணி
தூத்தூர், செயின்ட் ஜூட்ஸ் கல்லூரியில்1982-’84இல் மீன்வளம் உதவிப் பேராசிரியராகவும், 1984 ஜூலையில் விலங்கியல் புலத்தில் உதவிப் பேராசிரியராகவும் பணியாற்றத் தொடங்கினார். பணிக்காலத்தில் பல்கலைக்கழக இளையர் பட்ட கேள்வித்தாள், தேர்வு மதிப்பீட்டுக் குழுக்களில் உயர்பொறுப்புகள் வகித்தார். மே 2018இல் இணைப்பேராசிரியர்- துறைத் தலைவராய்ப் பணிநிறைவு பெற்றார். 2018-’19இல் தமிழ்நாடு டாக்டர் ஜெயலலிதா மீன்வளப் பல்கலைக் கழகத்தில் வருகைதரு பேராசிரியராய்ப் பணியாற்றினார்.
கல்லூரிப் பணிக் காலத்தில் இளையோர் நலம் (1987-’89), உலக பல்கலைக்கழக
சேவை (1987-’89), நாட்டு நலப்பணித் திட்டம் (1993-1999), செஞ்சுருள் சங்கம்
(2002-2004) உள்ளிட பல்வேறு திட்டங்களின் அலுவலராய்ப் பணியாற்றியுள்ளார். 2015-2018இல்
பல கல்லூரிகளில் உயர்கல்வி, நிர்வாகத் தணிக்கை புலமையாளராய்ச் சேவையளித்துள்ளார். 2016இல்
தமிழ்நாடு அரசுத் தேர்வு வாரியத்தின் தேர்வாளர் குழுவில் புலமையுறு உறுப்பினராக இருந்தார்.
ஆய்வுகள்
· முனைவர்
பட்டத்துக்காக பல்கலைக்கழக நிதிநல்கைத் திட்டத்தின் கீழ் புலம்சார் ஆய்வாளராக 1994-1995இல்
தேர்வாகி, தேங்காய்ப்பட்டினம் கழிமுகத்தில் உயிர்ச்சூழலியல் ஆய்வுகள் மேற்கொண்டார்.
· பல்கலைக்கழக
நிதிநல்கையுடன் அனந்த விக்டோரியா மார்த்தாண்டவர்மா கால்வாயிலும் (1998-2000), தேங்காய்ப்பட்டினம்
கழிமுகத்திலும் (2000-2002) மேலதிக ஆய்வுகள் மேற்கொண்டார்.
· 2003-04-ல்
உலக வங்கி- தமிழக அரசு நீர்வளத் துறை திட்டம் சார்பாக அறிஞர் எ.டி.சோபனராஜ் (முதன்மைக்
கலந்தறிவளர்) அவர்களின் தலைமையில் ‘கோதையார் வடிநில சூழலியல் ஆய்வு’த்திட்டத்தில் கலந்தறிவாளராகவும்
ஒருங்கிணைப்பாளராகவும் செயல்பட்டுள்ளார். அறிஞர் சோபனராஜுடன் இணைந்து கன்னியாகுமரி
மாவட்டக் குளங்கள், ஏவிஎம் கால்வாய் குறித்து சிறு வெளியீடுகளைக் கொணர்ந்தார்.
· மனோன்மணியம்
சுந்தரனார், அழகப்பா பல்கலைக் கழகங்களில் முனைவர் பட்ட ஆய்வு நெறியாளராய்ப் பதிவு பெற்று,
ஐந்து மாணவர்களை முனைவர் பட்ட ஆய்வில் நெறிப்படுத்தினார்.
· தேங்காய்ப்பட்டினம்
கழிமுக உயிர்ச்சூழலியல் குறித்து பன்னாட்டு, தேசிய ஆய்வரங்குகளில் எட்டு ஆய்வுக் கட்டுரைகள்
வாசித்துள்ளார். தவிரவும், பன்னாட்டு, தேசிய அறிவியல் ஆய்வேடுகளில் பதினைந்து கட்டுரைகள்
வெளியிட்டுள்ளார்.
· 1997-2018க்கு
இடைப்பட்ட காலத்தில் தில்லி பல்கலைக்கழகம், தமிழ்நாடு மீன்வளப் பல்கலைக்கழகம், மதுரை
காமராசர், மனோன்மணியம் சுந்தரனார், குஜராத் பேரிடர் மேலாண்மை ஆய்வு மையம், தில்லி தேசிய
பேரிடர் மேலாண்மை ஆணையம் மற்றும் 30க்கு மேற்பட்ட பல்கலைக்கழக, கல்லூரி/ ஆய்வு மையங்களில்
அறக்கட்டளை உரை/ பேருரை/ சிறப்புரைகள் நிகழ்த்தியுள்ளார்.
· 1999இல் குமரி மாவட்டக் கடற்கரை நீர்வளங்கள் குறித்து உள்ளாட்சித் தலைவர்களும் துறை வல்லுநர்களும் கூடி விவாதிக்கும் இரண்டு நாள் கருத்துப்பட்டறை நடத்தி, பட்டறைச் செயல்முறைகளை நூலாக ஆங்கிலத்திலும் தமிழிலும் தொகுத்து (புனித ஜூட்ஸ் கல்லூரி வெளியீடு) வெளிக்கொணர்ந்தார்.
பொது வாழ்க்கை
1976-’78இல் ஜான் போஸ்கோ இளைஞர் மையத்தில் தொடங்கப்பட்ட கையெழுத்துப் பிரதியின் ஆசிரியாராய்ச் செயல்பட்டார்.
1984இல் பெங்களூருவில் தேசிய இளம் கிறிஸ்தவத் தொழிலாளர் தலைமையகத்தில்
சிலகாலம் தனிச்சுற்று மாத இதழின் (YCW- National Info) ஆசிரியராய்ப் பணியாற்றினார்.
1990களில் சூழலியல், நீர்வளம், வள ஆதாரங்கள் குறித்து சிறு
பத்திரிகைகளில் எழுதிவந்தார். 1990களில் அக்மி அறக்கட்டளை என்னும் பெயரில் கல்லூரி
ஆசிரியர்களின் சிறு குழுவை நிறுவி, கடற்கரை மாணவர்களுக்கான உயர்கல்வி வழிகாட்டுதல்
அரங்குகளை நிகழ்த்திவந்தார். அதோடு, பெற்றோர்களுக்கும் ஆசிரியர்களுக்கும் இவ்வகை அரங்குகளை
நிகழ்த்தினார்.
2003இல் தேங்காய்ப்பட்டணம், குளச்சல் மீன்பிடி துறைமுகங்களுக்காக, மக்கள் இயக்கங்களுக்காக சிறப்பு ஆய்வுகள் மேற்கொண்டு ஆய்வுக் கட்டுரைகள் வெளியிட்டார்.
தொண்டு நிறுவனங்களுடனும் மக்கள் இயக்க அமைப்புகளுடனும் ஏற்பட்ட
தொடர்பு நிமித்தமாக கடலோர சமூகங்களுக்கான சுகாதாரம், சேமிப்பு, சுற்றுச்சூழல் சார்ந்த
விழிப்புணர்வு கருத்தாளராக அஞ்சுதெங்கு முதல் கன்னியாகுமரி வரையிலான கடற்கரைக் கிராமங்களில்
கருத்தமர்வுகள், பயிற்சிகள் நிகழ்த்தினார். கல்வி வழிகாட்டல், ஆளுமை மேம்பாடு குறித்த
சிற்றேடுகளையும் தயாரித்து வெளியிட்டார்.
இதன் தொடர்ச்சியாக, கடற்கரை வாழ்வியல், சூழலியல் குறித்து சிறு
பத்திரிகைகளில் எழுதிவந்தார். அக் கட்டுரைகளின் தேர்ந்தெடுத்த தொகுப்பு ‘நெய்தல்
சுவடுகள்’ என்னும் நூலாக வெளிவந்தது (2005).
2004 சுனாமியைத் தொடர்ந்து, அரசு, தொண்டு நிறுவனங்களின் தரப்பிலான புள்ளிவிவரங்களைத் தவிர்த்து, பேரிடர் மறுகட்டுமானத்தில்
மீனவர்கள் எதிர்கொண்ட சிக்கல்களையும் தீர்வுகளையும் அவர்கள் பார்வையில் பதிவிடும் பொருட்டு
நிகழ்த்திய இரண்டாண்டு களப்பதிவு ‘ஆழிப் பேரிடருக்குப் பின்’ என்னும் தொகுப்பாய்
வெளிவந்தது (இணை தொகுப்பாசிரியர்: ஜோசஃப் ஜஸ்டஸ்). இந்தியாவில் பேரிடர் மறுகட்டுமானம்
குறித்துக் கிடைக்கப்பெறும் ஒரே நிகழ் ஆவணம் இது.
பாதிரியார்கள் எட்வின் மரியஜான், ஜோசஃப் ஜஸ்டஸ் போன்றவர்களிடமிருந்து
கிடைத்த ‘மக்களின் சிக்கல்களை மக்களிடம் கொண்டு செல்வது மக்களின் மொழியில்தான் சாத்தியம்’
என்பதான புரிதல் தமிழில் தீவிரமான எழுத்தை நோக்கி வறீதையா நகரத் தூண்டியது. கவிஞர்
ரசூல், பேராசிரியர் நஞ்சுண்டன், மானுடவியலாளர் பிரான்சிஸ் ஜெயபதி, இலக்கிய விமர்சகர்
வேதசகாயகுமார் போன்றோருடன் கிடைத்த பரிச்சயம் எழுத்தைக் கூர்மைப்படுத்திக் கொள்ளவும்,
ஆழிப்பேரிடர் மறுகட்டுமானப் பின்னணியில் எழுத்துப்
பயணத்தை மீள வகுத்துக் கொள்ளவும் உதவியது. சமயத்தைக் கடந்து சென்று சமவெளியை நோக்கி
உரையாடுவதன் அரசியல் முக்கியத்துவத்தையும், எழுத்துதான் அதற்கான கருவி என்பதையும் பின்னவர்
இருவரிடமிருந்தே வறீதையா கற்றுக் கொண்டார். சமவெளியை நோக்கி உரையாடுவதற்கான மொழியைப்
பழகிக்கொண்டு தொடர்ந்து ஆய்விலும் எழுத்திலும் தன்னை ஈடுபடுத்திவருகிறார்.
கடற்கரைப் படைப்பார்வலர்களை ஒருங்கிணைத்து 2008- ‘09இல் தமிழகத்தின் முன்னணி ஆய்வு, படைப்பாளுமைகளை மாதம்தோறும் நாகர்கோவிலில் வரவழைத்து உரையாட ஏற்பாடு செய்தார். ஜெயபதி, ஆ.சிவசுப்பிரமணியன், முத்து.குணசேகரன், எச்.ஜி.ரசூல், ஜெயமோகன், வேதசகாயகுமார், சிவகாமி, பாமா, மாலதி மைத்ரி போன்றவர்கள் பங்கேற்றுள்ள இவ்வுரையாடல்களைத் தொகுப்பாக (விளிம்பு, மையம், மொழி, நெய்தல்வெளி- ஆழி கூட்டுப் பதிப்பு) வெளிக்கொணர்ந்தார் (இணை தொகுப்பாசிரியர்: வேதசகாயகுமார்). இலக்கிய விமர்சகர், பேராசிரியர் வேதசகாயகுமாரின் நெய்தல் குறித்த உரையாடல்கள், உரைகளை வரி வடிவத்தில் பதிந்து, ‘எக்கர்’ என்னும் தலைப்பில் தொகுத்தார்.
2010இல் குளச்சல் போரின் 267ஆவது நினைவுநாளை முன்னிட்டு திருவனந்தபுரம்
மீனவ வரலாற்று ஆர்வலர்களுடன் (வழக்குரைஞர் மெல்வின் வினோத், பெரேரா) இணைந்து நெய்தல்
படைப்பார்வலர்களின் சார்பில் முக்குவர் வரலாறு- தொடர் கருத்தரங்குகளை வேணாட்டுக் கடற்கரைக்
கிராமங்களில் ஒருங்கிணைத்தார். அங்கு வழங்கப்பட்ட உரைகளை ‘முக்குவர்: வரலாறு, வாழ்வியல்,
எதிர்காலம்’ என்னும் தலைப்பில் தொகுத்துப் பதிப்பித்தார் (நெய்தல்வெளி, 2010).
சுனாமிப் பதிற்றாண்டை முன்னிட்டு, சுனாமி மறுகட்டுமானம் தமிழகக்
கடற்கரைகளில் எம்மாதிரியான தாக்கத்தை ஏற்படுத்தியிருக்கிறது
என்பதைக் களம் சென்று ஆய்ந்தறியும் பொருட்டு
2014இல் ‘சுனாமி மீள்சந்திப்பு’ முயற்சியை மேற்கொண்டார். தமிழகத்தின் பல்வேறு
கடற்கரைகளில் பயணித்து, அங்குள்ள நிகழ்காலச் சூழலையும் மக்களின் எண்ணங்களையும் பதிவு
செய்து, ‘பழவேற்காடு முதல் நீரோடி வரை' என்னும் தலைப்பில் நூலாக்கினார். விகடன்
குழுமம் 2015இன் சிறந்த தமிழ்க் கட்டுரை நூலாக இதனைத் தெரிவு செய்தது.
2014இல் வெளிவந்த ‘மன்னார் கண்ணீர்க் கடல்’, இராமேசுவரம்
உள்ளிட்ட தென் தமிழகக் கடற்கரையின் சிக்கல்களின் அறியப்படாத முகத்தை வெளிச்சமிட்டது.
கள ஆய்வுகளின் அடிப்படையில் எழுதப்பட்ட இப்பிரதி பேராசிரியர் ச.வின்சென்ட்-இன் மொழிபெயர்ப்பில்
‘The Gordian knot’ (mainSpring Publishers, Chennai) என்னும் நூலாக வெளிவந்தது.
2014 நவம்பரில் குஜராத் மாநில பேரிடர் மேலாண்மை ஆணையத்தின்
அழைப்பை ஏற்று, பூஜ் பகுதியில் 2001 நிலநடுக்கப் பேரிடர் மறுகட்டுமானத்தைப் பார்வையிட்டார்.
கல்வியறிவிலும் பொருளாதாரத்திலும் மிகவும் பின்தங்கிய அப் பகுதியில் பேரிடர் மறுகட்டுமானத்தில்
சாதித்த வெற்றிக்கும் தமிழ்நாட்டில் சுனாமி மறுகட்டுமானத்தில் நேர்ந்த பெருந்தோல்விக்குமான
காரணங்களை ஆய்ந்து எழுதினார். பண்பாட்டுப் புரிதலின்மையும் பங்கேற்பு வாய்ப்பு மறுப்பும்
பேரிடர் மறுகாட்டுமானமே மற்றொரு பேரிடராய் மீனவர்கள்மேல் விடிவதற்குக் காரணமானது என்பதைப்
புரிந்துகொண்டார்.
2017 ஒக்கிப் பேரிடர்க் காலத்தில் கன்னியாகுமரி, கடலூர், தரங்கம்பாடி,
நாகப்பட்டினம், இராமேஸ்வரம், தூத்துக்குடிக் கடற்கரைகளுக்குப் பயணித்து, பேரிடர்ப்
பாதுகாப்பு, பேரிடர் அபலையர் மறுவாழ்வு குறித்து ஆய்வு செய்து, ‘1000 கடல் மைல்’
என்னும் நூலை எழுதினார்.
2018இல் கஜாப் புயல் பாதித்த வெள்ளப்பள்ளம், புஷ்பவனம், பரவாக்குடி
(திருவாரூர்), அதிராம்பட்டினம், கள்ளிவயல்தோட்டம் (தஞ்சாவூர்), மணமேல்குடி, ஜெகதாப்பட்டினம்,
மீமிசல் (புதுக்கோட்டை) கடற்கரைகளுக்குப் பயணித்து ஆய்வு செய்து ‘கஜாப் புயலும்
காவிரி டெல்ட்டாவும்’ என்னும் நூலை எழுதினார்.
2004 – 2018க்கு இடைப்பட்ட காலத்தில் நிகழ்ந்த நான்கு கடற்கரைப்
பேரிடர்களின் படிப்பினைகளையும் கடலோடிகளும் அரசுகளும் அப்பேரிடர்களை எதிர்கொண்ட விதம்
குறித்தும் ‘கடற்கோள் காலம்’ என்னும் தலைப்பில் எழுதினார் (2019). அதோடு தமிழகத்தின்
முன்னணி புனைவுப் படைப்பாளிகளின் 21 சிறுகதைகளைத் தேர்ந்தெடுத்து ‘கடல் சொன்ன கதைகள்’
என்னும் தொகுப்பாய்க் கொணர்ந்தார் (பாரதி புத்தகாலயம், 2019).
கன்னியாகுமரிக் கடற்கரைகளிலும் உள்ளூர்களிலும் வாழும் முக்குவர்
இனக்குழுவின் பண்பாட்டியல் வரலாறைக் ‘கன்னியாகுமரி முக்குவர்’ (ஆதி பதிப்பகம்,
2022) என்னும் தலைப்பில் எழுதியுள்ளார்.
2005க்கும் 2022க்கும் இடைப்பட்ட காலத்தில் தமிழகத்தின் 100க்கு
மேற்பட்ட கடற்கரைக் கிராமங்களுக்குப் பயணித்து 500க்கு மேற்பட்ட ஆளுமைகளைச் சந்தித்திருக்கிறார்.
சாதி, சமய, அரசியல் மாச்சரியங்களைக் கடந்து, நெய்தல் வாழ்வியலின் குறுக்குவெட்டாக அவற்றைத்
தொகுத்து, ‘பெருந்துறை வலசை’, (கடல்வெளி, கிண்டில், 2020) வெளிக் கொணர்ந்திருக்கிறார்.
வறீதையாவின் தன்வரலாறு ‘கையறுநதி’ (2022) கடல்வெளி பதிப்பாக
வெளிவந்துள்ளது. ஒரு நாவலை இப்போது எழுதி முடித்திருக்கிறார்.
இந்து தமிழ்திசை (கடலம்மா பேசுறங் கண்ணு!), குமுதம் தீராநதி
(மரண வியாபாரிகளின் தீவு), விகடன் டாட்காம் (இணையம்) (திரைகடலோடியும்…) இதழ்களில் இவரது
எழுத்துகள் தொடராக வெளிவந்துள்ளன.
கடற்கரைப் படைப்பாளிகளின் படைப்பூக்கத்தை வளர்க்கும் நோக்குடன்
நெய்தல்வெளி (2010), கடல்வெளி (2017) பதிப்பகங்களின் நிறுவன-பதிப்பாளராக
40க்கு மேற்பட்ட கடல்சார் நூல்களையும், ஒரு குறும்படத்தையும் (ஒயவு, 2017) வெளியிட்டுள்ளார்.
வறீதையா கான்ஸ்தந்தின் படைப்புகள் பற்றி
· நான்கு
தன்னாட்சிக் கல்லூரிகளில் வறீதையாவின் கட்டுரைகள் பட்டவகுப்பு முதல் தாள் தமிழ்
பாடநூலாக வைக்கப்பட்டன.
· ‘வறீதையாவின்
படைப்புகள் - ஓர் ஆய்வு' என்கிற தலைப்பில் ஜா.அனிதா வறீதையாவின் எழுத்துகள் மீதான
முனைவர்ப் பட்ட ஆய்வு செய்துள்ளார் (சென்னைப் பல்கலைக் கழகம், 2020).
வறீதையாவின் படைப்புகள், தொகுப்புகள்
குறித்த விரிவான விமர்சனங்கள், அறிமுகவுரைகள், மதிப்புரைகள் ‘கடலின் தொப்புள் கொடி’
என்னும் தொகுப்பாக கிண்டிலில் உள்ளது. வாசகர், விமர்சகர் மதிப்புரைகள் வலைப்பூவிலும்
உள்ளது: <https://www.vareethiah@blogspot.com>
வறீதையாவின் நூல்கள்
சிறுகதை
வர்ளக்கெட்டு (2014). எதிர் வெளியீடு, 2014; சீரமைத்த 2ஆவது பதிப்பு: கடல்வெளி, 2022.
கட்டுரைகள்
· கையறுநதி (தன்வரலாறு).
கடல்வெளி. 2022.
· கன்னியாகுமரி
முக்குவர். ஆதி பதிப்பகம், 2022)
· கடல்
பழகுதல். புலம். 2021.
· திணைவெளி. புலம்,
2021
· பெருந்துறை
வலசை
(2021/கிண்டில்)
· வேளம். உயிர்,
2021.
· கஜாப்
புயலும் காவிரி டெல்டாவும். பாரதி புத்தகாலயம், 2019)
· கடற்கோள்
காலம் (எதிர் வெளியீடு, 2019).
· கடலம்மா
பேசுறங் கண்ணு! இண்டு தமிழ்திசை, 2018; விரிவுபடுத்திய 2ஆவது
பதிப்பு, 2022.
· 1000
கடல் மைல். கடல்வெளி - தடாகம், 2018.
· மூதாய்மரம். தடாகம்,
2017.
· நெத்திலிக்
கருவாட்டின் வாசனை (நூல் விமர்சன்). உயிர் எழுத்து, 2014.
· பழவேற்காடு
முதல் நீரோடி வரை. எதிர் வெளியீடு. 2014.
· மன்னார்
கண்ணீர்க் கடல். தடாகம், 2014
· The
Gordian knot. (English version of மன்னார் கண்ணீர்க் கடல்:
Translated by: S.Vincent. I Edn. mainspring, 2018; II Edn. Kadalveli, 2022.
· கரைக்கு
வராத மீனவத் துயரம் (உயிர் எழுத்து- நெய்தல் வெளி, 2013.
· என்னைத்
தீண்டிய கடல், காலச்சுவடு, 2009.
· அணியம் (தமிழினி,
2007)
· நெய்தல்
சுவடுகள் (2005)
· The
Catastrophe and After. New Century Book House. 2008.
· The
Sea Tribes under Siege (mainspring- Kadalveli, 2017)
தொகுப்புகள்
கோடிமுனை முதல் ஐ.நா.வரை. 2020.
கடல் சொன்ன கதைகள் (சிறுகதைகள்) பாரதி புத்தகாலயம். 2020.
கடலின் தொப்புள்கொடி (வறீதையாவின் படைப்புகள் மீதான விமரசங்கள்). உயிர எழுத்து
· எக்கர்
(வேதசகாயகுமாரின் உரைகள்), உயிர் எழுத்து - நெய்தல்வெளி, 2013; கடல்வெளி (கிண்டில்)
2020.
· விளிம்பு,
மையம், மொழி (படைப்பாளுமைகளின் உரையாடல்), (இணைத் தொகுப்பாளர்: வேதசகாயகுமார்). 2011.
· கொந்தளிக்கும்
கடல் (ஜோ டி குரூசின் படைப்புலகம்) நெய்தல்வெளி, 2011.
· முக்குவர்:
வாழ்வியல், வரலாறு, எதிர்காலம். நெய்தல்வெளி, 2010.
· மீனவ
முன்னோடி லூர்தம்மாள் சைமன். நெய்தல்வெளி, 2010.
· ஆழிப்
பேரிடருக்குப் பின். (இணைத் தொகுப்பாளர்: ஜோசஃப் ஜஸ்டஸ்). காலச்சுவடு. 2006.
· குமரிக்
கடற்கரை நீர்வளங்கள்- புத்தாயிரம் ஆண்டில். செயின்ட் ஜூட்ஸ் கல்லூரி. 2000.
மொழிபெயர்ப்பு
· நினைவலைகள்
(பால் தாமஸ்) (மொழிபெயர்ப்பு) (இணை மொழிபெயர்ப்பாளர் ப.சாந்தி) 2020.
சிறு நூல்கள்:
· சங்காயம். கடல்வெளி,
2015.
· முகம்
மாறும் நிலம் (கல்லூரிப் பாடநூல்). கடல்வெளி, 2015.
· எரியும்
கடல், பதறும் கரை. நெய்தல்வெளி, 2014.
· தொண்டி
குறிப்புகள். நெய்தல்வெளி, 2014.
· ரவுத்திரம்
பழகு
(கல்லூரிப் பாடநூல்). நெய்தல்வெளி, 2014.
· காலடியில்
கண்ணிவெடி. நெய்தல்வெளி. 2014.
· காயீன்களின்
தேசம். நெய்தல்வெளி, 2014.
· கூஜா
நகரம் (கவிதைகள்). நெய்தல்வெளி, 2014.
· அந்நியப்படும் கடல். கீழைக்காற்று. 2012.
· மாரியா / The
Surf (இருமொழி வெளியீடு). நெய்தல்வெளி, 2013.
· மீன்வள
மசோதா-2009, அடித்தள மக்கள் நோக்கில். மணிமொழி பதிப்பகம், 2010.
ஆவணப் படம்
· இனயம்
கரண்ட்ஸ். <https://youtu.be/nes0B0N6vcI>
இயக்கம்: வறீதையா கான்ஸ்தந்தின், கடல்வெளி, 2017.
விருதுகள்
· பெரும்
பங்களிப்பாளர் விருது (கன்னியாகுமரி மாவட்ட வளர்ச்சிக்கு வாழ்நாள் பங்களிப்பு),
ஒற்றுமைக்கும் வளர்ச்சிக்குமான மக்கள் பாராளுமன்றம் (2017).
· மமா
ஆதா விருது (2017)
· அமுதன்
அடிகள் இலக்கியப் பரிசு (2017)
· விகடன்
இலக்கிய விருது- 2015 (சிறந்த கட்டுரைநூல்- பழவேற்காடு முதல்
நீரோடி வரை).
· கல்லூரிக்
கல்வி புகட்டுனர்க்கான அயாச்சே தேசிய விருது- 2009 (Innovative College
Educator Award) புது தில்லி.
இணைப்புகள்
இணையப் பதிவுகள்:
1. வறீதையா
கான்ஸ்தந்தின் வலைப்பூ: <https://www.vareethiah@blogspot.com>
2. அமேசான்
கிண்டிலில் வறீதையா கான்ஸ்தந்தினின் முக்கியமான படைப்புகள் அனைத்தும் கிடைக்கின்றன
(Vareethiah Konstantine).
3. வறீதையா
கான்ஸ்தந்தின்: தி இந்து தமிழ்திசை: கட்டுரைகள் <https://www.hindutamil.in/author/2658-%E0%AE%B5%E0%AE%B1%E0%AF%80%E0%AE%A4%E0%AF%88%E0%AE%AF%E0%AE%BE%20%E0%AE%95%E0%AE%BE%E0%AE%A9%E0%AF%8D%E0%AE%B8%E0%AF%8D%E0%AE%A4%E0%AE%A8%E0%AF%8D%E0%AE%A4%E0%AE%BF%E0%AE%A9%E0%AF%8D>
4. வறீதையா
கட்டுரைத்தொடர்/ சமயம் (2021):
· வறீதையா
/ மீனவர்
போராட்டங்கள்: பிழைப்பும் பெருமுதலீடும். <https://tamil.samayam.com/latest-news/state-news/the-impact-of-new-techniques-and-technologies-in-fishing/articleshow/84884306.cms>
·
வறீதையா / போலித்
தலைவர்களால் மீனவர்கள் படும் பாடு. <https://tamil.samayam.com/latest-news/state-news/a-set-of-self-appointed-leaders-exploit-fishermen-and-misrepresent-them/articleshow/84927334.cms>
· வறீதையா
/ மீன்வளத்தையே
அழித்துவிடக்கூடிய சிக்கல்கள். <https://tamil.samayam.com/latest-news/state-news/the-objectionable-ways-of-foreign-fishery-ships-could-destroy-the-whole-fishery-business/articleshow/84985488.cms>
· வறீதையா
/ மீன் வளம் பெருக்க என்ன செய்யலாம்? <https://tamil.samayam.com/latest-news/state-news/government-can-take-a-few-measures-to-restore-the-fisheries/articleshow/85010567.cms>
5. திரைகடலோடியும்/ ஆனந்தவிகடன் (2022): <https://www.vikatan.com/author/vrriitaiyaa-kaannnstntinnn>
1. கடலோடிகள்கிட்ட
கடலை ஒப்படைங்க / சமஸ் நேர்காணல் <https://writersamas.blogspot.com/2014/09/blog-post_11.html>
2. என்ன
வேண்டும் தமிழ்நாட்டுக்கு?- / <https://www.hindutamil.in/news/opinion/columns/646704-tn-elections-2021.html>
3. சிக்கல்களின்
பெருமுடிச்சு: காலச்சுவடு. <https://www.kalachuvadu.com/magazines/%E0%AE%95%E0%AE%BE%E0%AE%B2%E0%AE%9A%E0%AF%8D%E0%AE%9A%E0%AF%81%E0%AE%B5%E0%AE%9F%E0%AF%81/issues/104/articles/1-%E0%AE%9A%E0%AE%BF%E0%AE%95%E0%AF%8D%E0%AE%95%E0%AE%B2%E0%AF%8D%E0%AE%95%E0%AE%B3%E0%AE%BF%E0%AE%A9%E0%AF%8D-%E0%AE%AA%E0%AF%86%E0%AE%B0%E0%AF%81%E0%AE%AE%E0%AF%81%E0%AE%9F%E0%AE%BF%E0%AE%9A%E0%AF%8D%E0%AE%9A%E0%AE%BF>
4. வரலாற்றை
மீள எழுப்புதல்: வறீதையா கான்ஸ்தந்தின்: ஓலைச்சுவடி:
ஒலிப்பதிவு
எஸ்பிஎஸ் தமிழ் வானொலி நேர்காணல்
பகுதி 1: <https://r.search.yahoo.com/_ylt=AwrKAmN0AipjZOAbLXW7HAx.;_ylu=Y29sbwNzZzMEcG9zAzQEdnRpZAMEc2VjA3Ny/RV=2/RE=1663726325/RO=10/RU=https%3a%2f%2fwww.sbs.com.au%2flanguage%2fenglish%2faudio%2finterview-with-vareethiah-konstantine-part-1/RK=2/RS=UCRDXgwZ.b_NziEQ_OHanF8Jn7g->
காணொலிகள்:
1. இனயம்
கரண்ட்ஸ். <https://youtu.be/nes0B0N6vcI> இயக்கம்:
வறீதையா கான்ஸ்தந்தின், கடல்வெளி, 2017.
2. மண்ணும் மரபறிவும் | வறீதையா கான்ஸ்தந்தின்: <https://www.youtube.com/watch?v=a-RdGEV2rw0&ab_channel=%E0%AE%9A%E0%AF%82%E0%AE%B4%E0%AE%B2%E0%AF%8D%E0%AE%85%E0%AE%B1%E0%AE%BF%E0%AE%B5%E0%AF%8B%E0%AE%AE%E0%AF%8D-SuzhalArivom>
3. கடலில் இருந்து நதி புறப்படுகிறது- வறீதையா- -ஐந்திணை
சுற்றுச்சூழல் விழா- 2012-ஐந்திணை விழா/ இலயோலா கல்லூரி, சென்னை. <https://youtu.be/JiOLc-PUnWo>
4. கடலோடு
ஒரு பயணம்: kadalodu oru payanam, DULKAL: <https://youtu.be/AXElyxoQiNw>
5. 1000
கடல்மைல்/ நூல் வெளியீட்டுவிழா/ வறீதையா உரை: <https://youtu.be/ncdG9r8nkms>
6. வறீதையா
நேர்காணல். ஒக்கி: கண்ணுக்குப் புலப்படாத மக்களுக்கு நேர்ந்த புலப்படாத பேரிடர். பீர்
முகம்மது அசீஸ், இப்போது.காம். டிசம்பர் 2017. <https://youtu.be/eK4caDTzLDw>
7. கரைக்கடலும் கடற்கரையும்: <https://youtu.be/ZCG2Um_XRNM>
8. படித்ததில் பிடித்தது PEPPERS TV https://youtu.be/_URGuI-WBxA
2. வ.கீதா. ஜோ டி குரூஸ், வறீதையா கான்ஸ்தந்தின் எழுத்துகள்
குறித்த விமர்சனப் பதிவு. <https://vareethiah.blogspot.com/2014/09/the-sea-and-coast-v-geetha.html>
3. அலையாத்திகாடுகளில் நுழைந்து திரியும் பட்டாம்பூச்சிகள்:
முனைவர் வறீதையா கான்ஸ்தந்தின் அளித்த நெய்தல் மண்ணுக்கோர் சாசனம்: திண்ணை <http://old.thinnai.com/?p=60603318>
4. வறீதையா பதிவுகளில் எக்கர்:
ஜா. சஜிகுமார்: ஆய்வு: <https://ilakkiyasudarjournal.blogspot.com/2021/11/blog-post_50.html>
5. வறீதையாவின்
‘அந்நியப்படும் கடல்’ / நூல் விமர்சனம்/ பாலாஜி/ ஒயிட் நைட்ஸ். <https://youtu.be/IcQpLGUvwxU>
.jpg)
